रुखको जराबाट बनेको अनौठो पुल

इन्डोनेसियाको एउटा नदी किनारस्थित दुई वटा रुखको जराबाट बनेको पुल मानिसहरुका लागि आस्था र आकर्षणको केन्द्र बनेको छ । यो अनौठो पुल बनाउन करिब २४ वर्ष लागेको थियो ।
यहाँका स्थानीयका अनुसार यो पवित्र पुल मुनी नुहाउँदा सबै मनोकामना पूरा हुने गर्दछ । पश्चिम इन्डोनेसियाको पेशिशिर सेलातन जिल्लामा रहेको यो पुल ‘जेम्बातन अकर’ नामले चिनिन्छ ।
यो पुलले दुई गाउँलाई आपसमा जोडेको छ । यो पुल वरपरको क्षेत्रमा माछा मार्न पूर्णरुपमा प्रतिबन्ध लगाइएको छ । स्थानीयको विश्वास अनुसार पुल वरपर पाइने माछा पवित्र र देवदूत हुन् । यो पुल नदीको दुई किनारमा रहेको रुखका जराहरु जोडेर निर्माण गरिएको हो । यो पूर्णरुपमा प्राकृतिक छ । सन् १८९० मा पाकिह सोहन नामका उलेमाले यो बनाउने काम सुरु गरेका थिए । यो बनाउन २४ वर्ष लागेको थियो ।
अहिले दुवै गाउँबासी यो पुललाई ओहोरदोहोर गर्ने माध्यमका रुपमा प्रयोग गरिरहेका छन् । यहाँ पर्यटकको ताँती लागिरहन्छ ।