प्रहरीले नै ‘डन’हरुलाई भगाएको आशंका

पक्रन सक्ने हुँदा पनि प्रहरी चुपचाप

 जेठ ७ – गुन्डागर्दीबाट अकुत सम्पत्ति आर्जन गरेको अभियोगमा आइतबार सम्पत्ति शुद्धिकरण बिभागले मुद्दा चलाएका विराटनगरका २ अभियुक्तलाई प्रहरीले नै भगाएको पाइएको छ । गुन्डागर्दीको सहारमा अकुत सम्पत्ति जोडेका चर्चित डनहरुलाई पक्राउ गरी मुद्दा दर्ता गर्ने तयारी विभागले थालेपछि प्रहरीकै मिलेमतोमा विराटनगरका पर्शुराम बस्नेत र अभिषेक गिरी फरार भएको पाइएको छ ।

प्रहरी प्रधान कार्यालयले अभियुक्तहरुलाई पक्राउ गर्न मातहतका प्रहरीलाई सर्कुलर गरेपनि मोरङ प्रहरीले नै उनीहरुलाई पक्राउ गर्न चासो नदिएको वा फरार हुन सहयोग गरेको स्रोतको भनाई छ । नेपाल प्रहरीको अपराध अनुसन्धान व्युरोले डनहरुमाथि सम्पत्ति शुद्धिकरण आयोगले मुद्दा दर्ता गर्न लागेको भन्दै जेठ १ गते बुधबार नै गिरी र बस्नेतलाई पक्राउ गर्न मोरङ प्रहरीमा सर्कुलर गरेको थियो ।

तर, प्रहरीले शुक्रबार साँझ मात्र गिरी र बस्नेतको घरमा उनीहरुलाई खोज्दै छापा मारेको थियो । प्रहरी स्रोतका अनुसार विराटनगर १५ बस्ने युवासंघका केन्द्रीय सदस्य रहेका पर्शुराम बस्नेत, उनकी पत्नी संघकै केन्द्रीय सदस्य अञ्जुसिंह बस्नेत र अर्का डन विराटनगर ११ मधुमारा बस्ने अभिषेक गिरी र उनकी श्रीमति अनिषा गिरीलाई पक्राउ गर्न चाहेको भए कुनै समस्या थिएन । बस्नेत शुक्रबार अपरान्हसम्म विराटनगरमै खुलेआम रुपमा घुमिरहेका थिए ।

डन अभिषेक गिरी भने केही दिनदेखि काठमाडौंमै थिए । उनी काठमाडौंको कुन ठाउँमा बस्छन भन्नेपनि प्रहरीलाई थाहा थियो । तर, मोरङ प्रहरीले आपूmलाई केही पनि थाहा नभएको अभिनय गरेर कसैलाई पनि पक्राउ गर्न चाहेको देखिएन ।

दुई दिन अगाडि आएको निर्देशनलाई थन्क्याएर बसेको प्रहरी शुक्रबार साँझ अभियुक्तहरुले विराटनगर छाडिसकेपछि मात्र उनीहरुको घरमा पुगेको थियो । शनिबार मोरङको भौडाहामा हुने युवा संघ नेपालको क्षेत्रीय अधिवेशनको प्रमुख अतिथि भनेर रङ्गिन पोष्टरमार्फत प्रचार गरिएको भएपनि पर्शुराम बस्नेत प्रहरीले नै सूचना चुहाएकोले कार्यक्रममा सहभागी नभई फरार भएको श्रोतको दाबी छ । मोरङ प्रहरीले भने अभियुक्तहरु फरार भएपछि औपचारिकता पुरा गर्न उनीहरुको घरमा छापा मारेर सिआइबीलाई फरार भइसकेको जानकारी दिएको थियो ।

मोरङ प्रहरीका प्रवक्ता प्रहरी नायब उपरीक्षक दिपक पोखरेलले भने सर्कुलर प्राप्त हुनासाथ आफूहरुले पर्शुराम र अभिषेकहरुको खोजी सुरु गरेको तर फेला पार्न नसकेको दावी गर्नुभयो । बुधबार प्राप्त भएको सर्कुलर शुक्रबारसम्म लुकाएर अभियुक्तहरु फरार भएपछि मात्र उनीहरुको खोजी गर्ने मोरङ प्रहरीको कार्यशैली शंकास्पद देखिएको छ । डिएसपी पोखरेलले भने निर्देशन आउनसाथ खोजी थालेको तर घर तथा सार्वजनिक कार्यक्रममा पनि नभेटिएको बताउनु भयो ।

युवा संघका केन्द्रीय सदस्य तथा नेकपा एमाले मोरङका सचिबालय सदस्य रहेका पर्शुराम बस्नेत शनिबारका भौडाहामा हुने युवा संघको कार्यक्रममा प्रमुख अतिथि भएर जाने कार्यक्रम थियो । त्यसको लागि व्यापक रुपमा प्रचार गरी तयारी गरिएको थियो । कार्यक्रममा सहभागी हुन जाने तयारीमा रहेका उनले पक्राउ गर्न सर्कुलर आएको जानकारी पाएपछि बेलबारीबाट फरार भएको श्रोतले जनायो ।

युवा संघको भौडाहाको कार्यक्रममा एमाले मोरङका अध्यक्ष महेश रेग्मी, सचिव ऋषि पोखरेल लगायतलाई विशिष्ट अतिथी बताईएको थियो । तर, अध्यक्ष रेग्मी पर्शुराम प्रमुख अतिथि हुने कार्यक्रम भएकोले कार्यक्रममा सहभागी भएनन् । सचिव पोखरेल भने बस्नेत नआएपछि प्रमुख अतिथि बनेर कार्यक्रममा सहभागी भएका थिए ।

पार्टीको भाृत संगठनको कार्यक्रममा पार्टीका जिल्ला सदस्य रहेका बस्नेतले आपूmलाई प्रमुख अतिथि र जिल्ला अध्यक्षलाई विशिष्ट अतिथि बनाएर पोष्टर छपाएपछि रेग्मी भौडाहाको कार्यक्रममा गएनन् । ठूलो तयारीसहित शक्ति प्रदर्शन गर्ने उद्देश्यले गरिएको कार्यक्रमा पक्राउ पर्ने डरले बस्नेत अन्तिम समयमा उपस्थित हुन पाएनन् ।

विराटनगरमा सामान्य हैसियतका दुबैले केही समयको अन्तरालमा गुन्डागर्दीकै साहारामा अकुत सम्पत्ती आर्जन गरेका थिए । बस्नेतले आर्जन गरेको सम्पत्तीमध्ये ११ करोड ६१ लाख ४१ हजार ९ सय ७७ रुपैयाँ र गिरीको २ करोड ९४ लाख ४० हजार ५ सय ८८ रुपैयाँ ७२ पैसाको श्रोत नखुलेको पाइएको छ । उक्त सम्पत्ती आर्जनमा बस्नेतकी कान्छी श्रीमति अञ्जुसिंह बस्नेत र गिरीकी श्रीमति अनिषा गिरीको पनि संलग्नता रहेको भन्दै उनीहरु विरुद्ध पनि मुद्दा दर्ता भएको छ ।

प्रद्युम्न कार्की प्रहरी उपरीक्षक हुँदा गुण्डागर्दी, तस्करी र अन्य अपराध नियन्त्रण भएपछि वाहावाही पाएको मोरङ प्रहरीको अहिलेको नेतृत्व विवादमा फस्दै गएको छ । सर्बसाधारणको सम्पर्कमा आउन नचाहने र मोवाईल फोनसमेत कार्यालयमा डाईभर्ट गरेर बस्ने प्रहरी उपरीक्षक निरजबहादुर साही र प्रहरी नायक उपरीक्षक दिपक पोखरेलले मोरङ प्रहरीको कमाण्ड गरिरहेका छन् ।

प्रहरीले आफैले मुद्दा दर्ता गराएका अभियुक्तहरु पक्राउ नपरी खुलेआम हिड्नु र अभियुक्तहरुसँगै प्रहरीको सम्बन्ध रहेको देखिन थालेको छ । प्रहरीमाथि आक्रमण गरेको अभियोग लागेका एक अभियुक्त र अपहरण गर्ने धम्की दिएको आरोपमा सार्वजनिक अपराधमा मुद्दा दर्ता गरिएका युवासंघ मोरङका उपाध्यक्ष मुकेश वुढाथोकी पक्राउ गर्न प्रहरीले नचाहेकोले उनीहरुसँग मिलेमतोको आशंका गरिएको छ ।