मानिस अब ‘सिटिजनबाट नेटिजन’

 सूचना प्रविधि समाज नेपालद्वारा  आयोजित विश्व आइसिटी विकासमा युवाको भूमिका विषयक अन्तरक्रियामा वक्ताहरूले सूचना प्रविधिको विकासले युवालाई संसारभरी अवसर दिएको धारणा व्यक्त गरे ।
उनीहरूले  युवाले रोजगारीको खोजी गर्ने होइन, अरुलाई रोजगारी दिन सक्छौ भन्ने प्रतिबद्धता व्यक्त गर्नुपर्ने बताए ।
कार्यक्रममा पूर्वमन्त्री गणेश शाहले नेपाल जस्तो कृषिप्रधान मुलुकमा कृषिमा काम गर्नेलाई पनि सूचना प्रविधिबारे जान्ने अवसर दिएमा कृषिको विकास गर्न मद्दत मिल्ने बताउनुभयो ।
उहाँले संविधानसभाको निर्वाचनमा पनि चुनावको सम्पूर्ण क्रियाकलाप आइसिटीमा जान सके पोस्टर टाँसेर चुनाव प्रचार गर्ने परम्परा समाप्त हुने बताउनुभयो ।
नेपाल उद्योग वाणिज्य महासङ्घ आइसिटी विकास महाशाखाका अध्यक्ष विप्लवमान सिंहले सन् १९७९ मा पर्सनल कम्प्युटरको विकास भएको चर्चा गर्दै हाल मानिस ‘सिटिजनबाट नेटिजन’को रुपमा परिणत भएको उल्लेख गर्नुभयो ।
एसोसियसन अफ युथ अर्गनाइजेसनका महासचिव तिलोत्तम पौडेलले नेपालमा समावेशी सूचना प्रवाहको विकास गर्न सकेमा सवै वर्ग र समुदायको हित हुने बताउँदै सन् २००३ सम्म रोल्पाबाट काठमार्डौमा फोन गर्न छ घण्टा लाइन बस्नुपर्नेमा अहिले सूचना प्रविधिको विकासले सूचना प्रवाह खल्तिबाटै हुने गरेको प्रसङ्ग उल्लेख गर्नुभयो ।
कम्युप्युटर विशेषज्ञ मुनिबहादुर शाक्यले कालिकोटमा सानो रोगबाट पनि सयौं मान्छे मर्ने गरेको चर्चा गर्दै आईसिटीको विकासले चार हजार मानिसलाई स्वास्थ्य सेवा प्रदान गरेको चर्चा गर्नुभयो ।
समाजका अध्यक्ष चन्द्रविलास भुर्तेल, क्यानका अध्यक्ष विनोद ढकाल,, इन्जिनीयरिङ अध्ययन संस्थानका सहायक डिन डा सुवर्ण शाक्यलगायतले आइसिटीको विकास, फेसवुकमा लाखौं युवाको संलग्नता, त्यसबाट आएको विकृतिमासमेत प्रकाश पार्नुभएको थियो ।